चोरखोला गाडी दुर्घटनामा घाइते निशाको निधन

दाङ, १६ असोज । दाङ–सल्यान सडकखण्डको चोरखोलामा भएको गाडी दुर्घटनामा मृत्यु हुने संख्या चार पुगेको छ । दुर्घटनामा गम्भिर घाइते रुकुम पश्चिमको बाफिकोट–४ निवासी ३६ वर्षिय निशा केसी वलीको उपचारको क्रममा आज बिहान निधन भएको छ ।

उहाँको निधन भएसंगै चोरखोलामा भएको गाडी दुर्घटनामा मृत्यु हुनेको संख्या चार पुगेको छ । वलीको भारतको लखनउमा उपचारको क्रममा निधन भएको उहाँका आफन्त प्रचण्ड देवकोटा खत्रीले जानकारी दिनुभयो ।

गत आइतबार बिहान रुकुम पश्चिमबाट दाङको घोराहीतर्फ जाँदै गरेको लु २ ख ६५०२ नम्बरको फोर्स गाडी सल्यानको कपुरकोट–३ चोरखोलामा दुर्घटना भएको थियो । दुर्घटनामा दुई पुरुष र एक महिलासहित तीन जनाको घटनास्थलमै मृत्यु भएको थियो । गाडी सडकबाट करिब एक सय मिटर तल खसेको हो ।