सागर सुबेदी / दाङ
दाङको तुलसीपुर कारागारका ७६ कैदीबन्दी अझैँ फरार रहेका छन । फरार हुँदा स्थानीय समुदायमा ठुलो भय र असुरक्षा फैलिएको छ । समुदायमा चोरी, लुटपाट तथा हिंसाको त्रास फैलिएको छ ।
जेनजी प्रदर्शनको क्रममा गत भदौ २३ र २४ गते कारागार कार्यालय तुलसीपुरबाट भागेका २५३ जना मध्ये आफै फर्किएका तथा प्रहरीले पक्राउ गरी हालसम्म १५६ जना नियन्त्रणमा आइसकेका छन भने ७६ जना अझैँ फरार रहेका छन ।
कारागार कार्यालय तुलसीपुरका जेलर गिर बहादुर सेजुवालले दिएको जानकारी अनुसार फरार २५३ जना मध्ये २१ जना अन्यत्र भागेको अवस्थामा प्रहरीले नियन्त्रणमा लिई जिल्ला बाहिरको कारागारमा रहेका छन । यस्तै अन्य जिल्लाका फरार ११ जना कैदीलाई दाङ प्रहरीले नियन्त्रणमा लिई कारागार कार्यालय तुलसीपुरमा राखिएको छ ।
फरार कैदीबन्दीहरुको नेपाल प्रहरी, शसस्त्र प्रहरी बल लगायतको सक्रियतामा खोजी कार्य भैरहेको जेलर सेजुवालले सिएनटीप्रेससँगको कुराकानीमा बताएका छन । जेलर सेजुवालले भने “फरार कैदीबन्दीहरुको फोटो सहितको तिन पुस्ते विवरण नेपाल प्रहरीलाई उपलब्ध गराइसकेका छौँ, जतिसक्दो चाँडो खोजी गरी नियन्त्रणमा ल्याउनेछौँ ।”
