लायन्स क्लब अफ दाङ क्यापिटलको आयोजनामा शनिबार तुलसीपुरमा बृहत रक्तदान कार्यक्रम सम्पन्न भएको छ। तुलसीपुरस्थित राप्ती प्रादेशिक अस्पताल परिसरमा रहेको नेपाल रेडक्रस सोसाइटीको रक्त सञ्चार केन्द्रमा कार्यक्रम आयोजना गरि रक्तदान गरिएको हो।
कार्यक्रमका प्रमुख अतिथि लुम्बिनी प्रदेशसभा सदस्य धनबहादुर मास्कीले रक्तदानलाई महान् मानवसेवा भन्दै यसको निरन्तरतामा जोड दिनुभयो। रगतले कसैको जीवन बाच्नुका साथै नियमित रक्तदान अभियानले समाजमा सकारात्मक प्रभाव पार्ने बताउनुभयो । रक्तदान गर्ने व्यक्तिले अरूको जीवन मात्रै मात्रै नबचाएर आफू पनि स्वस्थ हुने उहाले बताउनुभयो ।।
विशिष्ट अतिथि लायन्स क्लबका डिस्टृक्ट गभर्नर ज्ञानेन्द्र श्रेष्ठले समाजसेवामा लायन्स क्लबको निरन्तर योगदान उल्लेख गर्दै रक्तदानलाई लायन्स आन्दोलनकै महत्वपूर्ण अभियानको रुपमा व्याख्या गर्नुभयो। रगत दान गर्नु भनेको जीवन दान गर्नु भएकाले यो सबैभन्दा ठूलो पुण्यकार्य भएको बताउनुभयो ।
लायन्स क्लब अफ दाङ क्यापिटलका संस्थापक अध्यक्ष हिमाल डाँगीले क्लब स्थापना कालदेखि नै सामाजिक सेवाका थुप्रै गतिविधिहरु सञ्चालन हुँदै आएको उल्लेख गर्दै आगामी दिनमा अझै प्रभावकारी कार्यहरु हुने बताउनुभयो।
त्यसैगरी हालका अध्यक्ष अजित खनालको अध्यक्षतामा सम्पन्न कार्यक्रममा अध्यक्ष खनालले नियमित रक्तदान कार्यक्रमलाई निरन्तरता दिने प्रतिबद्धता व्यक्त गर्नुभयो ।
कार्यक्रममा अन्य वक्ताहरूले समेत रक्तदानको महत्वबारे प्रकाश पारेका थिए।
कार्यक्रममा दर्जनौँ मानिसहरूले रक्तदान गरेका थिए, जसबाट राप्ती प्रादेशिक अस्पतालमा रगत अभाव हुने अवस्थालाई केही हदसम्म सहज बनाउने अपेक्षा गरिएको छ।
लायन्स क्लब अफ दाङ क्यापिटलका प्रथम उपाध्यक्ष डम्बर के.सीको स्वागत मन्तव्यबाट सुरु भएको कार्यक्रमको सहजीकरण सचिब भुपेन्द्र ओलिले गर्नुभएको थियो ।
