दाङको तुलसीपुरमा मादक पदार्थ सेवन (मापसे) गरेर अटो रिक्सा चलाइरहेका एक चालकलाई अन्य अटो चालकहरूले खादा ओडाएर सम्मान गरेको भिडियो सार्वजनिक भएको छ । सामाजिक सञ्जालमा फैलिएको भिडियोमा मापसे गरेर अटो चलाइरहेका चालकलाई अर्का एक अटो चालकले खादा ओडाएर सम्मान गरेपछि ट्राफिक प्रहरीले उनलाई सम्झाई बुझाई गरेको देखिन्छ ।
प्राप्त भिडियो अनुसार उक्त चालकले मापसे गरेको अवस्थामा सवारी साधन चलाइरहेका थिए । यसै क्रममा त्यहाँ उपस्थित अर्का एक अटो चालकले उनलाई खादा ओडाउँदै व्यङ्ग्यात्मक शैलीमा ‘सम्मान’ गरेका थिए । त्यसपछि घटनास्थलमा पुगेका ट्राफिक प्रहरीले मापसे गरेर सवारी नचलाउन चेतावनी दिँदै नियमको पालना गर्न सम्झाएका छन ।
ट्राफिक प्रहरीले मापसे गरेर सवारी चलाउनु आफैं र अरूको ज्यान जोखिममा पार्ने गम्भीर अपराध भएको बताउँदै यस्तो कार्य दोहोरिन नदिन सबै चालकलाई सचेत रहन आग्रह गरेका छन ।
यस्तो गतिविधि बढ्दै जानु चिन्ताको विषय भएको भन्दै ट्राफिक नियम कडाइका साथ लागू गर्न पछिल्लो समय तुलसीपुरमा ट्राफिक प्रहरीले मापसे चेकिङ तथा ट्राफिक चेकिङ कार्यलाई तिव्रता दिएको बताएको छ ।
