दैनिक सयौँ खेलाडीले अभ्यास गर्ने तथा स्थानीय देखि राष्ट्रिय स्तर सम्मका खेलकुद आयोजना हुने तुलसीपुरकै सबैभन्दा पुरानो खेल मैदान अरनिको खेल मैदानमा खेलाडीहरुलाई शौचको लागी समस्या हुने गरेको छ ।
खेलाडीलाई हुने शौचको समस्यालाई मध्यनजर गर्दै तुलसीपुर नगर जेसिजले सार्वजनिक शौचालय निर्माण गरेर तुलसीपुर उपमहानगरपालिकालाई हस्तान्तरण गरिसके पनि हस्तान्तरण भएको करिब ३ महिना बितिसक्दा पनि उक्त शौचालय प्रयोगमा आउन सकेको छैन । २०८१ भदौ २२ गते शौचालयको शिलान्यास गरेर निर्माण थालेको तुलसीपुर नगर जेसिजले करिब १६ महिना लगाएर निर्माण सम्पन्न गरि २०८२ पुष २९ गते तुलसीपुर उपमहानगरपालिकालाई हस्तान्तरण गरेको थियो ।
सम्पूर्ण स्वामित्व, सन्चालन, मर्मत सम्भार तथा व्यवस्थापनको जिम्मेवारी तुलसीपुर उपमहानगरपालिकाको हुने गरी तुलसीपुर नगर जेसिजले दुई पक्षिय सम्झौता गरेर शौचालय हस्तान्तरण गरेपनि तुलसीपुर उपमहानगरपालिकाले भने वास्ता नै नगरेको पाइएको छ ।
एकैपटकमा १० जना महिला तथा १० जना पुरुषले प्रयोग गर्न सक्ने शौचालय तुलसीपुर उपमहानगरपालिकालाई हस्तान्तरण गरे पश्चात मेयर टिकाराम खड्काले तुलसीपुर नगर विकास समिती मार्फत सन्चालन गर्ने बताएका थिए । हाम्रो प्रश्न “शौचालय किन सन्चालनमा आउन सकेन ?” भन्दा मेयर खड्का जवाफ दिन्छन : “नगर विकासले सन्चालन गर्ने हो, हामीसँग जनशक्ती छैन । अरनिको मैदानलाई स्तरोन्नती गर्न पालिकाले २५ लाख बजेट छुट्याएको छ, उक्त बजेटबाट काम भयो भने एकैपटक हामी निर्णय गर्छौँ ।” त्यहि मैदान मै तुलसीपुर उपमहानगरपालिका वडा नं ६ ले पनि केहि समय पहिले करिब सहत्तर हजार बराबरको लागतमा शौचालय निर्माण गरेको थियो तर उक्त शौचालय पनि हाल प्रयोग गर्न मिल्ने अवस्थामा छैन ।
खेल मैदानमा शौचालयको समस्या हुँदा खेलाडीहरु नजिकैको होटल चाहार्दै हिँड्नुपर्ने वा खुल्ला शौच गर्न बाध्य भएका छन ।
