तुलसीपुर, दाङ — नेपाल तरुण दलको ७३औं स्थापना दिवसको अवसरमा सोमबार तुलसीपुर उपमहानगरपालिका–११ कटाहामा जन्मजात अपाङ्गता भएका १८ वर्षीय थमन चौधरीलाई ह्विलचियर वितरण गरिएको छ ।
नेपाल तरुण दल तुलसीपुर नगर समितिका अध्यक्ष कमल घर्तीको अध्यक्षतामा ‘समाज सेवामा तरुण दल’ भन्ने नारासहित आयोजित कार्यक्रममा नेपाली काँग्रेस तुलसीपुर नगर सभापति सुरेश हमालसहित नेपाली काँग्रेसका अन्य नेताहरू, कार्यकर्ता तथा स्थानीयको उपस्थिती रहेको थियो ।
अध्यक्ष घर्तीले नेपाल तरुण दल केवल राजनीतिक संगठन मात्र नभई समाजसेवामा पनि अग्रसर रहँदै आएको बताउँदै आगामी दिनमा पनि यस्ता सेवा मूलक कार्यक्रम निरन्तर गरिने प्रतिबद्धता जनाएका छन ।
यस अवसरमा वक्ताहरूले नेपाल तरुण दलको स्थापना दिवसले युवालाई जिम्मेवार र सेवामुखी बन्न प्रेरणा दिने बताएका थिए ।
अध्यक्ष घर्ती केहि समय अघि नेपाल तरुण दल तुलसीपुरको अध्यक्ष होइनन भनि जिल्ला अध्यक्षले कारबाही गरेको पत्र बाहिरिए सँगै विवादित बनेका थिए तर नेपाली काँग्रेस तुलसीपुरले घर्ती नै नेपाल तरुण दल तुलसीपुर नगर कमिटीको आधिकारिक अध्यक्ष भएको पत्र सार्वजनिक गरे पश्चात अहिले सामाजिक सेवामा अग्रसर भएका छन ।
