भालुवाङ । गैरसरकारी संस्था महासंघ (गैसस) लुम्बिनी प्रदेशले २०३० सम्मको साझा रणनीतिक योजना निर्माण र नीतिगत स्पष्टताका लागि प्रदेशस्तरीय अभिमुखीकरण कार्यक्रम भव्य रूपमा सम्पन्न गरेको छ। बुधबार भालुवाङमा सम्पन्न कार्यक्रममा गैसस पदाधिकारी, विज्ञ, सामाजिक अभियन्ता, पत्रकार, र विभिन्न क्षेत्रका सरोकारवालाबीच सशक्त अन्तरक्रियात्मक विमर्श भयो। सहभागीहरूले सामाजिक विकास, समुदायको उत्थान र नागरिक समाजको भूमिकालाई अझ सशक्त बनाउनुपर्नेमा एकमत व्यक्त गरे।
केन्द्रीय उपाध्यक्ष संजय लम्सालले गैससले समयानुकूल रणनीति र उद्यमशीलतामुखी कार्यक्रम ल्याउनुपर्ने आवश्यकता औंल्याए। लुम्बिनी प्रदेश अध्यक्ष सुशिला बेल्बासेको सभापतित्वमा सम्पन्न कार्यक्रममा सल्लाहकार सुमित्रा शर्मा, केन्द्रीय सचिव नमस्कार शाह, पत्रकार महासंघ लुम्बिनी अध्यक्ष शुक्रऋषि चौलागाईंसहितका वक्ताहरूले नीतिगत स्पष्टता र प्रभावकारी कार्यान्वयनका लागि ठोस सुझाव प्रस्तुत गरे।
यसैक्रममा, गैसस महासंघ लुम्बिनी प्रदेश समितिको विस्तारित बैठकले असोज मसान्तभित्र जिल्ला अधिवेशन गर्ने, संस्थाको विवरण अद्यावधिक गर्ने र रिक्त पदमा मनोनयन गर्ने निर्णय गरेको छ। बैठकले प्रदेश उपसचिव अर्जुन डाँगीलाई सचिवमा र सदस्य शंकर न्यौपानेलाई उपसचिवमा मनोनित गरेको छ। यी निर्णयलाई प्रदेशस्तरमा गैससको सशक्त संगठनात्मक संरचना निर्माणतर्फको महत्वपूर्ण कदमका रूपमा लिइएको छ।
कार्यक्रमले लुम्बिनी प्रदेशका गैरसरकारी संस्थाहरूबीच साझा दृष्टिकोण र सहकार्यको वातावरण सिर्जना गरेको छ। सरोकारवालाले प्रेस स्वतन्त्रता, भेला हुने र संगठित हुने अधिकारको संरक्षणका लागि संयुक्त रूपमा आवाज उठाउनुपर्नेमा जोड दिएका छन्। गैसस लुम्बिनीले यस किसिमका अभिमुखीकरण र रणनीतिक छलफललाई निरन्तरता दिँदै प्रदेशको सामाजिक विकासमा नेतृत्वकारी भूमिका निर्वाह गर्ने प्रतिबद्धता जनाएको छ।
