साउन ९, दाङ । नेशनल प्याब्सन दाङको आयोजनामा विद्यार्थीहरुका लागि ओरेन्टेसन कार्यक्रम तुलसीपुरमा सम्पन्न भएको छ। जिल्लाका एक दर्जनभन्दा बढी विद्यालयबाट सहभागी भएका ७०० भन्दा बढी विद्यार्थीहरूको सहभागितामा कार्यक्रम भव्य रूपमा सम्पन्न भएको हो।
नेशनल प्याब्सन दाङका अध्यक्ष भोजराज न्यौपानेको अध्यक्षता तथा नेशनल प्याब्सनका केन्द्रिय उपाध्यक्ष प्रकाश कुमार शर्माको प्रमुख आतिथ्यतामा सम्पन्न भएको हो । त्यस्तै बिशिस्ट अतिथ्यतामा तुलसीपुर उपमहानगरपालिकाका शिक्षा शाखाका अधिकृत मनबहादुर खड्का तथा प्रमुख प्रशिक्षक क्षेत्र प्रसाद ज्ञवालीले गर्नुभएको थियो ।
प्रमुख प्रशिक्षक क्षेत्रप्रसाद ज्ञवालीले विद्यार्थीलाई लक्षित गर्दै प्रेरणादायी प्रशिक्षण दिनुभएको थियो । साना प्रयासहरूबाट पनि ठूलो परिवर्तन सम्भव छ भन्ने आत्मविश्वास राख्न ज्ञवालीले जोड दिनुभयो ।
प्रमुख अतिथि प्रकाश कुमार शर्माले शिक्षा केवल किताबी ज्ञानमा सीमित नभएर , व्यवहारमा रूपान्तरण हुन जरुरी रहेको बताउनुभयो । शिक्षा अधिकृत मनबहादुर खड्काले विद्यार्थीहरूको उत्साहजनक उपस्थिति देख्दा आफूलाई गर्व लागेको बताउदै यस्तो खालका कार्यक्रमहरुले बालबालिकामा सकारात्मक सोच विकास गर्दै भविष्य निर्माणमा सहयोग पुर्याउने धारणा राख्नुभयो ।
अध्यक्ष भोजराज न्यौपानेले सबै विद्यालयका प्रतिनिधि, शिक्षक, अभिभावक र सहभागी विद्यार्थीप्रति आभार प्रकट गर्दै आगामी दिनमा अझ प्रभावकारी कार्यक्रमहरु सञ्चालन गर्ने प्रतिबद्धता व्यक्त गर्दै आज सिकेका कुराहरूलाई व्यबहारमा लागू गरेमा मात्रै लक्ष्य प्राप्ति सङ्गै सफल हुने बताउनुभयो ।
कार्यक्रममा नेशनल प्याब्सनका केन्द्रिय सदस्य बिमल गौतम , रिपोर्टस क्लब दाङका अध्यक्ष शरद रेग्मी लगाएतले सम्बोधन गर्नुभएको थियो ।
नेशनल प्याब्सन तुलसीपुरका अध्यक्ष लोकेन्द्र खड्काको स्वागत मन्तव्यबाट सुरु भएको उक्त कार्यक्रमको सहजीकरण जिल्ला सचिब हरि प्रसाद भण्डारीले गर्नुभएको थियो ।
