बिशाल विश्वकर्मा, फागुन १८
पछिल्लो केही समय यता दाङको तुलसीपुर उपमहानगरपालिका वडा नं १८ स्थित रानी पार्क ताल आन्तरीक पर्यटकको आकर्षणको केन्द्र बन्दै गएको छ । घोराही तुलसीपुर सडकखण्ड अन्तर्गत हेमन्तपुर चोक बाट उत्तर तर्फ करिब १.७ किलोमिटरको दुरीमा यो ताल अवस्थित छ ।
रानी पार्क ताल एउटा कृत्रिम ताल हो । करिब ६० हेक्टर जग्गामा सिंचाईको लागी पानी प्रयोग गर्ने उद्धेश्य सहित पानी संचित गर्न रानी ताल निर्माण गरिएको हो ।
यस क्षेत्रको प्राकृतिक सौन्दर्य, हरियाली वातावरण र तालको शान्त परिवेशले आन्तरिक पर्यटकहरूलाई आकर्षित गरिरहेको छ । अहिले ताल अवलोकन गर्न, वनभोज खान लगायतको प्रयोजनका लागी दैनिक आन्तरिक पर्यटकहरु यहा आँउने गरेको कोलकाटे टोल बिकास संस्थाका अध्यक्ष नोखराज वलीले बताए । यहाँ पुग्ने पर्यटकहरुले तालमा बोटीङ गरि भरपुर मनोरन्जन लिन सक्छन ।
दुधेगजेरी जलाशय बाट चिनिने यस ताल रानी सामुदायिक वन सङैं भएको हुनाले नाम परिवर्तन गरी रानी पार्क ताल राखिएको स्थानिय बासिन्दाहरू बताउछन ।
ताल घुम्न आउने पर्यटकका लागि रानी ताल संरक्षण समितिले प्रवेश शुल्क निशुल्क गरेको छ भने, तालमा बोटिङ गर्ने पर्यटकका लागि प्रति व्यक्ति रु ५० को टिकटको व्यवस्था मिलाइएको छ ।
यस रानी पार्क ताल प्राकृतिक सौन्दर्यका लागि मात्र नभई सिँचाइको प्रमुख स्रोतको रूपमा पनि महत्वपूर्ण रहेको र स्थानीय कृषकहरूले तालको पानी प्रयोग गरी खेतीपाती गर्दै उनीहरूको उत्पादन वृद्धि गर्न महत्वपूर्ण योगदान पुर्याउने वलीले बताए ।
ताल वरपरको क्षेत्रलाई थप व्यवस्थित बनाउन सरसफाइ अभियान, वृक्षारोपण तथा अन्य पर्यटनमैत्री कार्यक्रम सञ्चालन भइरहेको वलीले बताए । प्राकृतिक सौन्दर्यले भरिपूर्ण यस ताललाई व्यवस्थित र पर्यटकीय गन्तव्यका रूपमा प्रवद्र्धन गर्न स्थानीय सरकारले पनि सहयोग गरेको वली बताउँछन ।
रानी पार्क तालको उचित व्यवस्थापन गरी यसलाई सिँचाइको दिगो स्रोतका रूपमा विकास गर्न सके यसले कृषिमा आत्मनिर्भरता बढाउन मद्दत गर्ने र तालको व्यवस्थापनले पर्यटनसँगै कृषि उत्पादनमा समेत सकारात्मक प्रभाव पार्ने विश्वास गरिएको छ ।
