तुल बहादुर कवँर मगर / भालुबाङ ६ फागुन
दाङको राप्ती गाउँपालिका वडा नम्बर १ भालुबाङ पुलचोक बजार क्षेत्रकाे मंगलबार सरसफाइ गरिएको छ।
राष्ट्रिय प्रजातन्त्र दिवसको पूर्व सन्ध्यामा राप्ती गाउँपालिका दाङ र ब्रह्माकुमारी ईश्वरीय विश्व विद्यालय शाखा पाखापानीको संयुक्त आयोजनामा तथा विभिन्न संघसंस्था र सुरक्षाकर्मीहरुको सहयोगमा उक्त सरसफाइ कार्यक्रम सम्पन्न भएको हो।
साे अवसरमा राप्ती गाउँपालिकाका अध्यक्ष प्रकाश विष्टले वर्षको एक दिन मात्रै सरसफाइ
कार्यक्रम गरेर नपुग्ने भन्दै प्रत्येक नागरिकले आफ्ना घर र परिवेशलाई सफा राख्नका लागि जिम्मेवार हुनु पर्ने बताउनुभयो ।
त्यस्तै उहाँले सरसफाईलाई केवल सरसफाइमा सीमित नगरी आनीबानी र आचरणमा समेत सुधार ल्याउनुपर्ने आवश्यकता औंल्याउनुभयाे।
“सफाई अब हाम्रो संस्कारको हिस्सा बन्नुपर्छ र प्रत्येक व्यक्तिले आफ्नो घर वरपर सफा राख्न आफ्नो जिम्मेवारी सम्झनु पर्दछ,”उहाँले भन्नुभयो।
सरसफाइ कार्यक्रममा पालिकाका कर्मचारी, ब्रह्माकुमारी ईश्वरीय विश्व विद्यालय पाखापानी शाखाका , राप्ती उद्योग वाणिज्य संघ पदाधिकारी, सशस्त्र प्रहरी बल नेपाल २९ नं. बाहिनी, इलाका प्रहरी कार्यालय र ट्राफिक प्रहरी भालुवाङका सुरक्षाकर्मीहरु, ऐरावती आदर्श बहुमुखी क्याम्पसका शिक्षक तथा विद्यार्थी, रोटरी क्लब अफ राप्ती, आशाका किरण संस्था र टोल विकास संस्थाका पदाधिकारीहरूको सहभागिता थियो।
