मंसिर २, नेपालगन्ज । जलवायु वित्तका लागि जारी कोप – २९ को समर्थनमा नेपालगन्जमा र्याली गरिएको छ । कार्यक्रममा मंगल प्रसाद नमुना माबि, नगरस्तरिय किशोरी संजाल नेपालगञ्ज, लुम्बिनी प्रदेश किशोरी संजाल र ‘वाईसीएएल नेटवर्क खजुरा’, शान्ति पुर्णस्थापना केन्द्र बाँके, तुलसी सामाजिक बिकास केन्द्र दाङ, सहयात्री नेपालको सहकार्यमा कार्यक्रम भएको छ । कार्यक्रममा मंगल प्रसाद नमुना माबिका नेपाल स्काउट, क्लिनिक क्ल्व, बाल क्लब, इको क्लव गरि १५० विद्यार्थीको सहभागितामा विभिन्न झाँकी प्रदर्शनका साथै सचेतनात्मक नारा पनि लगाइएको थियो ।
नेपालका १६ सहरहरुमा गरिए अनुसार नेपालगन्जमा पनि अजरबैजानमा जारी कोप-२९ को समर्थनमा र्याली गरिएको हो। यो आन्दोलनले वैश्विक उत्तर(ग्लोबल नर्थ) का सरकारलाई ऐतिहासिक जलवायु ऋण चुकाउन र वैश्विक दक्षिण (ग्लोबल साउथ) प्रतिको आफ्नो वित्तीय दायित्व पूरा गर्न आह्वानमा एकिबद्धता जनाउन गरिएको समेत आयोजक कमिटी ले जानकारी दिए ।
आजको र्यालीको केन्द्रीय माग स्पष्ट छ: वैश्विक उत्तरले(ग्लोबल नर्थले) आफ्नो जलवायु वित्तको प्रतिवद्धता पूरा गर्नुपर्छ। औद्योगिक देशहरूको ऐतिहासिक जलवायु ऋण, जसको अनुमानित रकम प्रति वर्ष पाँच ट्रिलियन अमेरिकी डलर छ त्यो चुकाउनु पर्नेछ। यो भविष्यको लागि एक न्यायपूर्ण र दिगो मार्गको पहिलो किस्ता हो, जसले विश्व उत्तरको विगतका कार्य र निष्क्रियताले सिर्जना गरेका गम्भीर असमानताहरू र अन्यायहरू न्युनिकरण गर्ने समेतमा र्यालीमा सहभागी भएकाहरुले जोड दिए ।
जलवायु संकटले विश्वका सबै देशमा समान रूपको र साझा चुनौती सिर्जना गरेको छैन। ग्लोबल नर्थले आर्थिक वृद्धिका लागि गरेका क्रियाकलापहरूले, दक्षिणका देशहरूविशेष गरी नेपालजस्ता देशहरुले दैनिक रूपमा यसको भयानक प्रभावहरूको सामना गरिरहेका छन्, जस्तै बाढी, खडेरी, र गर्मी लहर। हाम्रा हिमश्रिखंला दिन दिनै पगलिदै गएका छन र हिमताल फुटने लहरो छ। नेपाल जस्तो देशको लागि जलवायु संकटले प्रति दिन नयाँ चुनौती थपदैछ, जसले हाम्रो जीविकोपार्जन र जैविक विविधतालाई नै खतरा पुर्याउदैछ। तसर्थ अब वैश्विक उत्तरले आफ्नो ऐतिहासिक जिम्मेवारी स्वीकार गरेर कदम चालनु बाहेक अन्य कुनै उपाय नभएको समेत र्याली सहभागीहरुले बताए।
