तुलसीपुर, कात्तिक ११ । दाङको तुलसीपुरस्थित अरनिको मैदानमा आजदेखि लुम्बिनी प्रदेश स्तरिय तेक्वान्दो प्रतियोगिता सुरु हुँदै छ । लुम्बिनी प्रदेश तेक्वान्दो संघको आयोजनामा कात्तिक ११ गतेदेखि १३ गतेसम्म चल्ने प्रतियोगिताको उद्घाटन बिहान ११ बजेपछि नेपाली काँग्रेसका केन्द्रीय सदस्य तथा पूर्व मन्त्री दीपक गिरी र अर्का केन्द्रीय सदस्य गेहेन्द्र गिरीले गर्ने भएका छन।
तेक्वान्दो संघ लुम्बिनी प्रदेशका अधयक्ष बिमल रिजालले लुम्बिनी प्रदेश स्तरिय दोस्रो खुल्ला तेक्वान्दो प्रतियोगिता २०८१ आयोजना गरिएको र त्यसमा प्रदेश भरका झन्डै आठ सय हाराहारी खेलाडी तथा प्रशिक्षकहरु विभिन्न जिल्लाहरुबाट तुलसीपुरमा आइ सकेको जानकारी दिएका छन ।
प्रतियोगिता आयोजक समिति संयोजक मोहन सुनारले प्रतियोगिताको सम्पूर्ण तयारी पुरा भइ सकेको जानकारी दिए ।
लुम्बिनी प्रदेश तेक्वान्दो संघका कोषाध्यक्षसमेत रहेका सुनारले खेलाडीको हौसलाको लागि प्रतियोगितामा उपस्थितिका लागि खेल प्रेमी सबैमा आग्रह गरेका छन ।
प्रदेशका १२ जिल्लाका आठ सय हाराहारीमा खेलाडी आएको हुँदा तुलसीपुरका सबै होटेलहरु भरिभराउ हुने लुम्बिनी प्रदेश तेक्वान्दो संघका महासचिव विनिल केसीले बताए । विभिन्न जिल्लाहरु बाट आउने खेलाडीहरुलाई तुलसीपुर क्षेत्रका सम्पूर्ण होटेलहरुमा बसोबासको व्यवस्थापन गरिएको र त्यसले एक पटक तुलसीपुरको व्यापार तथा पर्यटन पर्बद्धनमा टेवा पुग्ने उनले आशा ब्यक्त गरेका छन ।
