तुलसीपुर, असोज ११
तुलसीपुरमा बर्षातको समयमा हुनसक्ने सम्भाव्य डुबान, जोखिम स्थल र स्थानहरुको कार्यवाहक नगर प्रमुख सहितको जनप्रतिनिधिहरुको समुहले अवलोकन गरेको छ ।
तुलसीपुर उपमहानगरपालिका वडा नं ११ अन्तर्गत पर्ने मोतीपुर, बगरपुर, बेल्टाकुरा र शितलपुर क्षेत्रको नदी कटान क्षेत्रमा जन प्रतिनिधिहरुले अवलोकन गरि त्यहाँ आसपासमा बसोबास गरिरहेका जनताहरुलाई सतर्क रहन समेत अनुरोध गरेका छन ।
तुलसीपुर उपमहानगरपालिकाका कार्यबाहक नगर प्रमुख तथा तुलसीपुर उपमहानगरपालिका वडा नं १८ का वडाअध्यक्ष माधव वली, तुलसीपुर उपमहानगरपालिका विपत व्यवस्थापन समितिका संयोजक तथा तुलसीपुर उपमहानगरपालिका वडा नं ६ का वडाअध्यक्ष दुजमान भण्डारीे “बर्षात”, तुलसीपुर उपमहानगरपालिका सामाजिक विकास समितिका संयोजक तथा तुलसीपुर उपमहानगरपालिका वडा नं ११ का वडाअध्यक्ष मान बहादुर रावत, तुलसीपुर उपमहानगरपालिका पूर्वाधार विकास समितिका संयोजक तथा तुलसीपुर उपमहानगरपालिका वडा नं ३ का वडाअध्यक्ष विर बहादुर बि.क ‘विजय’ र नगर स्तरीय युवा सञ्जालका अध्यक्ष ओद बहादुर भण्डारी ‘गणेश’ को टोलीले वि.सं २०७२ सालमा आएको बबई नदीले कटान गरेको तथा डुबानमा पारेको क्षेत्रमा अवलोकन गरी नदी क्षेत्र आसपासमा बसोबास गर्ने स्थानीयहरुलाई सतर्क तथा सजक रहन आग्रह गरेका छन ।
बबई नदीको सतह बढेको र आफुहरु जोखिमको त्रासमा रहेको भन्ने सूचना दिएपछि कार्यवाहक नगर प्रमुख सहितको टोलीले उक्त क्षेत्रमा अवलोकन गरेको र निरन्तर बर्षातका कारणले बबई नदीको सतह पनि केहि बढेको पाइएको हुँदा त्यस क्षेत्र वरपर रहेका टोलका अध्यक्षहरु तथा स्थानीयहरुलाइ बर्षातको समय भर सजक र सतर्क रहन तथा अप्ठ्यारो परिस्थितीमा जुनसुकै समयमा पनि स्थानीय सरकार तथा आपतकालिन नम्बरहरुमा सम्पर्क गर्न भनिएको तुलसीपुर उपमहानगरपालिकाका कार्यबाहक नगर प्रमुख तथा तुलसीपुर उपमहानगरपालिका वडा नं १८ का वडा अध्यक्ष माधव वलीले बताउनुभयो ।
