भदौ, १५ / तुलसीपुर
दाङको तुलसीपुरमा सन्चालित ग्रेट अरनिको माध्यमिक विद्यालय मा कक्षा ११ मा भर्ना भएका नव आगन्तुक बिद्यार्थीहरूलाई एक कार्यक्रमका बिच स्वागत गरिएको छ । तुलसीपुर उपमहानगरपालिका वडा नं ६ स्थित कराही होटलमा कक्षा १२ का बिद्यार्थीहरूले एक कार्यक्रम आयोजना गरी कक्षा ११ का बिद्यार्थीहरूलाई स्वागत गरिएको हो ।
तुलसीपुर उपमहानगर पालिका सामाजिक विकास समितिका संयोजक मान बहादुर रावतको प्रमुख आतिथ्यतामा कार्यक्रम गरिएको थियो । कार्यक्रममा बोल्दै प्रमुख अतिथि रावतले बिद्यार्थीहरूको दिमागमा बसेको कक्षा १२ पास गरेर बिदेश जाने भन्ने मनोविज्ञान आफैमा गलत भएको कारण यस मनोविज्ञान लाई आजैदेखि हटाई देशमै केहि गर्ने सोँच पलाउन जरूरी रहेको बताउनुभयो । साथै यस बर्ष अघिल्लो बर्ष भन्दा परिक्षामा थप कडाई गरिने हुँदा बिद्यार्थीहरूलाई आफ्नो अध्ययनमा विशेष ध्यान दिन बताउनु भएको हो ।
उक्त स्वागत कार्यक्रममा यस शैक्षिक बर्षमा अध्ययन गर्न आउनुहुने ५५० जना बिद्यार्थीहरुलाइ स्वागत गरिएको थियो । राष्ट्रिय लोक दोहोरी गायक शक्ति चन्द लगायतका कलाकारहरूले कार्यक्रमलाई थप मनोरञ्जनमय बनाउनुभयो ।
बिद्यालयका प्रिन्सिपल विष्णुप्रसाद देवकोटा को सभाध्यक्षतामा सम्पन्न कार्यक्रम को सहजीकरण बिद्यालयका पूर्व शिक्षक नारायण प्रसाद भट्टराई ले गर्नु भएको थियो ।
