कैलाली, टिकापुर । २३ वर्षीय प्रदीप तिमिल्सिना, जो टिकापुरमा अध्ययनरत एक कृषि विज्ञान विद्यार्थी हुन्, फोटोग्राफीको संसारमा आफ्नो पहिचान बनाउँदैछन्। प्रदीपको जीवनमा फोटोग्राफीको यात्रा केही वर्षअघि सुरु भयो, जब उनले पहिलो पटक क्यामेरा हातमा लिए। त्यो क्षणले उनको जीवनको मार्ग बदलिदियो।
प्रदीपको फोटोग्राफीको यात्रा अनौठो तरिकाले सुरु भयो। बाल्यकालमा प्राकृतिक दृश्यहरू र वरपरको वातावरणले उनलाई सधैं आकर्षित गर्थ्यो। उनी त्यही दृश्यहरूलाई आफ्नो तरिकाले कैद गर्न चाहन्थे, जसले गर्दा उनलाई फोटोग्राफीप्रति मोह जाग्यो। । “सुरुमा मोबाइलबाट देखेका दृश्य कैद गर्थ। क्यामेरा समात्दा मैले दृश्यलाई नयाँ दृष्टिकोणबाट हेर्ने मौका पाए,” प्रदीपले भने।
उनले क्यामेराको साना साना फिचरहरू सिक्न समय खर्च गरे, र यसै क्रममा उनले फोटोग्राफीको मूलभूत सिद्धान्तहरूलाई आत्मसात गरे। प्रदीपले विभिन्न अनलाइन स्रोतहरूबाट फोटोग्राफीको बारेमा थप ज्ञान हासिल गरे र आफ्नो सीपलाई अझै परिष्कृत गरे।
प्रदीपका तस्बिरहरूले ग्रामीण जीवनको सौन्दर्य, प्राकृतिक दृश्यहरू, र मानिसहरूको हर्षलाई विशिष्ट रूपमा कैद गर्छन्। उनका फोटाहरूले नजिकैको प्राकृतिक सौन्दर्यलाई चित्रण गर्दै, मानिसहरूको जीवनशैलीलाई जीवन्त बनाउँछन्। उनको यो कला टिकापुरमा मात्र होइन, सामाजिक सञ्जालहरूमा पनि चर्चित बनेको छ। उनका तस्बिरहरूलाई विभिन्न संघसंस्थाले आयोजना गरेका विभिन्न प्रतियोगितामा पुरस्कृत गरिएको छ, जसले उनको प्रतिभालाई अझै उजागर गरेको छ।
प्रदीपका लागि फोटोग्राफी केवल एक हाबी मात्र होइन, बरु जीवनको अभिन्न हिस्सा हो। ” फोटोग्राफीले मलाई बाहिरी संसारसँग मात्र होइन, मेरो आन्तरिक भावनासँग पनि जोड्न मद्दत गर्छ र फोटो खिच्दा आत्मसन्तुष्टि हुन्छ”, उनले भन्छन।
उनको यो यात्रा न केवल प्रेरणादायी छ, तर युवा पुस्ताका लागि एउटा उदाहरण पनि हो। प्रदीपको कथाले देखाउँछ कि कसरी एउटा सानो रुचिले भविष्यको ठूलो लक्ष्यलाई जन्म दिन सक्छ। क्यामेराप्रति उनको मोहले उनलाई जीवनमा नयाँ दिशा दिएको छ, र यसले उनलाई निरन्तर प्रगतिको मार्गमा अघि बढाइरहेको छ।
कास्कीको पोखरा घर भएका प्रदीप तिमिल्सिना अहिले कृषि तथा बन बिज्ञान बिश्वबिध्यालयको आङ्गिक क्याम्पस प्राकृतिक स्रोत ब्यबस्थापन कलेज टीकापुरमा कृषि विज्ञानमा स्नातक पढ्दै छन्।
