दाङ, २ चैत ।
घोराही उपमहानगरपालिका –१५ सडक विभाग ओरालो नजिक रहेको बुद्ध ईन्टरनेशनल हस्पिटलमा यही फागुन २९ गते उपचारका लागि आएका राजपुर गाउँपालिका–१ का नौ वर्षीय बालक सुरेश कँवरको उपचारको क्रममा मृत्यु भएपछि आन्दोलित पीडित पक्ष र बुद्ध इन्टरनेशनल हस्पिटल घोराहीबिच सहमति भएको छ ।
घटनाबारे सत्यतथ्य पत्ता लगाउन लुम्बिनी प्रदेश स्वास्थ्य निर्देशनालयको नेतृत्वमा सात सदस्यीय छानबिन समिति गठन भएपछि दुई दिनदेखि जारी आन्दोलन सकिएको हो । अस्पतालको सेवाका विषयमा पटक–पटक प्रश्न उठेको र अहिले पनि यो घटना भएपछि नियमनकारी निकायकै नेतृत्वमा सात सदस्यीय छानबिन समिति गठन गरिएको प्रमुख जिल्ला अधिकारी रामबन्धु सुवेदीले जानकारी दिए । लुम्बिनी प्रदेश स्वास्थ्य निर्देशनालयको संयोजकत्वमा जिल्ला प्रशासन कार्यालय, घोराही उपमहानगरपालिका, नाक, कान, घाँटी विशेषज्ञ तीनजना र पीडित पक्षको प्रतिनिधि छानविन समिति सदस्य छन् । अस्पताल प्रदेशकै मातहतमा रहेकोले लुम्बिनी प्रदेश स्वास्थ्य निर्देशनालयकै नेतृत्वमा समिति बनेको छ । ‘समितिले जतिसक्यो चाँडो अध्ययन गरेर प्रतिवेदन ल्याउने सहमति छ’– प्रजिअ सुवेदीले भने– ‘सैद्धान्तिकरुपमा समितिले पाएको प्रतिवेदनको आधारमा कारवाही गर्ने, नियमन गर्ने, सेवा सुधार गर्ने वा मेडिकल काउन्सिलमा सिफारिस गर्ने त्यसपछि हुनेछ । त्यो बाहेक अस्पताल र पीडित पक्षबीच आपसी समझदारी भएपछि मृतकको शव पोष्टमार्टमका लागि राप्ती स्वास्थ्य विज्ञान प्रतिष्ठान लगिएको छ ।
अस्पताल र पीडित पक्षबिच सहमति भएको र शव प्रतिष्ठानमा राखिएको मृतकका बुवा शालिकराम कँवरले जानकारी दिए उनले शुक्रबार बिहान शवको पोष्टमार्टम गरी शव बुझ्ने सहमति भएको बताए । समितिले पाँच दिनभित्र प्रतिवेदन ल्याउने र त्यसकै आधारमा कारवाही गर्ने सहमति भएको पीडित कँवरले बताए ।
