फाल्गुन १४
घुँडामाथिसम्म दुवै खुट्टा गुमाएर पनि सगरमाथा चढेका पूर्वबेलायती सैनिक हरि बुढा मगरलाई सोमबार बिहान घोराहीमा नागरिक अभिनन्दन गरिएको छ ।
गोरखा ग्रुपको आयोजनामा भएको नागरिक अभिनन्दनमा विभिन्न संघ संस्था शुभेच्छुकहरूको सहभागिता रहेको थियो । साँस्कृतिक झाँकीसहित घोराहीको भानु चोकबाट गाडीमा राखेर बुढालाई बजार परिक्रमा गराई उद्योग वाणिज्य संघको सभागृहमा एक कार्यक्रमबीच अभिनन्दन गरिएको हो ।
बुढाले गत जेठ ५ गते उनले विश्वको सर्वोच्च शिखर सगरमाथा आरोहण गरेका थिए । बुवा नौला बुढा मगर र आमा पुरइ बुढा मगरको कोखबाट वि।स। २०३६ सालमा रोल्पाको थवाङ गाउँपालिका ३ मिरुलमा जन्मिएका बुढा गोरखा ग्रुप दाङका सस्थापकमध्येका एक हुन् । गोरखा ग्रुप पूर्व लाहुरेहरूको संस्था हो जसले शिक्षा, स्वास्थ्य र कृषि क्षेत्रमा काम गर्दै आएको छ ।
सन् १९९९ जनवरी १ मा ब्रिटिस आर्मीमा भर्ना भएका बुढा सन् २०१० अप्रिल १७ को अफगानिस्तानको युद्धमा एम्बुसमा परी घाइते भएका थिए । त्यही चोटका कारण उनले दुवै खुट्टाको घुँडामाथिसम्मको भाग गुमाउन पुगे ।
खुट्टा गुमे पनि हौसला नगुमाएका उनले २०८० जेठ ५ गते दिनको ३ बजेर १० मिनेट जाँदा सर्वोच्च शिखर सगरमाथा आरोहण गर्न सफल भए । दृढ इच्छा शक्ति, संकल्प र उच्च साहसका साथ निरन्तर खटेर राष्ट्र्रिय पहिचानका लागि अन्तर्राष्ट्र्रिय रेकर्ड राख्न सक्षम बुढा मगरलाई सम्मानस्वरूप नागरिक तहबाट अभिनन्दन गरिएको गोरखा ग्रुपका अध्यक्ष मानबहादुर बुढाले बताए ।
