दाङ, १४ फागुन ।
घोराही-तुलसीपुर सडकमा आजदेखि ‘टाइम कार्ड’ लागु भएको छ । सवारी दुर्घटना न्यूनिकरण गर्नका लागि ‘टाइम कार्ड’ लागु गरिएको हो । टाइम कार्ड लागु भएसंगै घोराही-तुलसीपुरको दुरी ७० मिनेटमा पार गर्नुपर्ने भएको छ ।
घोराहीको बसपार्कदेखि तुलसीपुर बसपार्कको दूरी, घोराहीको तुलसीपुर चोक र तुलसीपुरको घोराही चोकमा बस रोकिने समयसमेत गरेर ७० मिनेट राखिएको जिल्ला ट्राफिक प्रहरी कार्यालय दाङका प्रमुख किरण प्रकाश मल्लले जानकारी दिनुभयो ।
आजदेखि लागु भएको टाइमकार्ड अनुसार घोराही- तुलसीपुर सडकखण्डको दुई चरणमा गरेर ७० मिनेट निर्धारण गरिएको छ । जसमा घोराही तुलसीपुर सडकखण्डको घोराही-नारायणपुर ३० मिनेट र नारायणपुर-तुलसीपुर ४० मिनेट समय निर्धारण भएको छ ।
प्रतिकिलोमिटर औसत तीन मिनेट समय निर्धारण गरेर टाइमकार्ड लागु गरिएको प्रमुख मल्लले बताउनुभयो । ट्राफिक प्रहरीका अनुसार तोकिएको समयको मापदण्ड पालना नगर्ने संवारी साधनलाई कारबाही गरिनेछ ।
शुरुमा पाँच सय, दोस्रो पटक एक हजार, तेस्रो पटक एक हजार पाँच सय जरिवाना गरिने उहाँले बताउनुभयो । पहिलो चरणमा सार्वजनिक सवारीलाई मात्रै टाइमकार्ड लागु गरिएको तर निजि सवारी साधन पनि तिब्र गतिमा चलाउन नपाउने प्रमुख मल्लले बताउनुभयो ।