नेपालको वैकल्पिक टीम नेपाल ए क्यानडा एघारसँगको तेस्रो तथा अन्तिम एक दिवसीय खेलमा पराजित भएको छ । यससँगै तीन खेलको शृंखला २-१ ले क्यानडाले जितेको छ ।
नेपालले दिएको १८२ रनको लक्ष्य क्यानडाले ३८ ओभर ५ बलमा ६ विकेट गुमाएर पूरा गर्यो । क्यानेडिन टीमलाई जीतसम्म डोहोर्याउने क्रममा निकोलस किर्तोनले सर्वाधिक ५८ रनको योगदान गरे ।
नेपालका साहब आलमले ४ तथा शेर मल्ल र बसिर अहमदले १-१ विकेट लिए । यसअघि टस हारेर पहिले ब्याटिङको निम्तो पाएको नेपाल ए ४७ ओभरमा १८१ रन जोड्दा अलआउट भएको थियो ।
नेपालका लागि आशुतोष घिरैयाले २८, अर्जुन कुमालले २७, बसिर अहमदले २५, सन्दीप जोराले २४, सुजन थपलियाले २० तथा रसिद खान र प्रतिश जीसीले समान १९ रनको योगदान गरे । यससँगै नेपाल एले आफ्नो पहिले एकदिवसीय सिरिजलाई बिट मारेको छ । नेपालमा पहिलोपटक वैकल्पिक खेलाडीलाई समेटेर नेपाल ए टीम बनाइएको हो ।
