हेर्नलाई सकिए समदृष्टि
देखिनेछ रसिलो भव-सृष्टि
जिन्दगी लय‚ मनोहर हुन्छ
शक्तिवर्धक छदैछ र छुन्छ ।१।
एक यो खुस हुने छ उपाय
प्रेरणा‚ सुगमको छ प्रदाय
तिक्तता सहज घट्छ‚ हुदैन
रिक्तता सकिन जान्छ‚ छुदैन ।२।
क्रोध घट्छ‚ घटियापन हट्छ
स्वास्थको स्थिति अझै अघि बढ्छ
चित्त केन्द्रित हुने छ‚ गरिन्छ
ध्येय पुग्छ र प्रकाश भरिन्छ ।३।
बिर्सिने यदि छ साथ स्वभाव
हट्छ घट्छ मनबाट खराव
छुट्छ दुष्ट जनबाट प्रभाव
धैर्यको पनि हुँदैन अभाव ।४।
पन्छिइन्छ मनबाट तनाव
गर्न सक्छ यसले प्रतिवाद
बिर्सिने भुवनका सब ताप
हट्छ दुष्ट जनको पनि राप ।५।
बद्लिएर बनिनेछ “म” हामी
जिन्दगी तब हुने अझ दामी
हाँस्न‚ खेल्न सकिए मन छुन्छ
दृष्टि दोष नभए सुख हुन्छ ।६।
✍️ :क्षितिज पौडेल
तिलोत्तमा नगरपालिका वडा नं २ योगिकुटी रूपन्देही नेपाल
