पुस ८ । २०२३ को ईण्डियन प्रिमियर लिग (आईपीएल) को अक्सन आज शुक्रबार हुदैछ ।
भारतको कोची शहरमा १६ औं संस्करणको लिगको अक्सन नेपाली समयअनुसार दिउँसो पौने ३ सुरु हुनेछ । अक्सनमा अधिकतम ८७ स्थानका लागि ४ सय ५ खेलाडी बीच प्रतिस्पर्धा हुनेछ । प्रत्येक टोलीले बढीमा २५ जना मात्र खेलाडी अनुबन्ध गर्न पाउने छन् ।
अक्सनमा २ सय ७३ भारतीय र १ सय ३२ विदेशी खेलाडी बीच प्रतिस्पर्धा हुदैछ । विदेशी खेलाडीमा ४ खेलाडी एसोसियट देशबाट छन् । ३० विदेशी खेलाडीको स्थान बाँकी छ । प्रत्येक टोलीले बढीमा ८ विदेशी खेलाडी राख्न पाउँछन् ।
आइपिएलमा आफ्नो न्यूनतम मूल्य २ करोड भारु राख्ने १९ विदेशी खेलाडी छन् । यस पटक भारतीय कुनैपनि खेलाडीले आफ्नो न्यूनतम मूल्य २ करोड राखेका छैनन् । ११ खेलाडीले न्यूनतम मूल्य १ करोड ५० लाख भारु राखेका छन् ।
सनराईजर्स हैदराबाद यस पटक अक्सनमा सर्वाधिक खर्च गर्न पाउने फ्रेन्चाइज टोली हो । कप्तान केन विलियम्सन र निकोलस पुरनलाई फुकुवा गरेको हैदराबादसँग अक्सनमा खर्च गर्न ४२।२५ करोड भारतिय रुपैयाँ बाँकी छ । अक्सनमा हैदराबादमा १३ खेलाडीको स्थान बाकीँ रहँदा ४ विदेशी खेलाडीको स्थान खाली छ ।
कोलकाता नाइट राइडर्स अक्सनमा सबैभन्दा कम रकम भएको फ्रेन्चाइज टोली हो । कोलकतासँग ७।५ करोड भारु मात्रै बाँकी छ । अक्सनमा कोलकाताको ११ खेलाडीको स्थान बाँकी छ । जसबाट ३ विदेशी खेलाडी अनुबन्ध गर्न पाउँछ ।
